اجمل ما فيكي يا مصر للشاعر ابراهيم رضوان

( 1 )
أجمل ما فيكى يا مصر......
هى طيور بتحضن فى السما
آدى الجناح جنب الجناح .. يا نسمة .. يا متنسمة
يا ام السما صافيه.. ودافيه ..إنما
ما تحبش الغربان .. وديما للبلابل ملهمه
يا بلدنا ... يا ماسكه ميزان العدل جوه المحكمه


( 2 )
أجمل ما فيكى يا مصر........
إن الشعر نايم على الكتاف
يا سيسبان ..هيام على مليون ضفاف
آدى الفروع ... نازله بتشرب م البحور
الخضره فوق فستانك المفرود لحاف
صفصاف يا سمره.. يطمن القلب اللى خاف



(3)
أجمل مافيكي يا مصر
ديك أخضر بيدن ع السطوح
مليان ياسمره كبرياء
بيبوح اذا شاف السكوت
سيطر ياسمره علي البيوت
وعلي السطوح ييجي.. يروح
يفرد جناحه علي الجموع
يصبح شموع
ويكون عشان فجرك طموح