اجمل ما فيكي يا مصر للشاعر ابراهيم رضوان

( 1 )
أجمل ما فيكى يا مصر......
هى طيور بتحضن فى السما
آدى الجناح جنب الجناح .. يا نسمة .. يا متنسمة
يا ام السما صافيه.. ودافيه ..إنما
ما تحبش الغربان .. وديما للبلابل ملهمه
يا بلدنا ... يا ماسكه ميزان العدل جوه المحكمه


( 2 )
أجمل ما فيكى يا مصر........
إن الشعر نايم على الكتاف
يا سيسبان ..هيام على مليون ضفاف
آدى الفروع ... نازله بتشرب م البحور
الخضره فوق فستانك المفرود لحاف
صفصاف يا سمره.. يطمن القلب اللى خاف



(3)
أجمل مافيكي يا مصر
ديك أخضر بيدن ع السطوح
مليان ياسمره كبرياء
بيبوح اذا شاف السكوت
سيطر ياسمره علي البيوت
وعلي السطوح ييجي.. يروح
يفرد جناحه علي الجموع
يصبح شموع
ويكون عشان فجرك طموح

كل يوم في الخامسة صباحا للشاعر علاء خالد

لسنوات طويلة
كان يهجره النوم في الخامسة صباحاً
فيقوم ليطارده فوق أسطح العمارات المجاورة

يستسلم للشرفة
لكوب الشاي النقي
لأول سيجارة سيمتص رحيقها
للجريدة التي لم يجف حبرها
للشارع الخالي من الذكريات

كل شيء لامع
ليست هناك أتربة على الإفريز
ليس هناك من يأتي بعده
ليطعم أسراب النمل

كانت أمه قد ماتت
وبقى هو يتتبع آثارها
في هواء الصباح
الباكر
في حنان الشاي

في قطعة البسكويت التي كانت
تدفعها دفعاً إلى فمه
فينفرط جزء منها على الأرض
في حواراتهما الهادئة

كرسيان متقابلان
لا مفر من الحب
حتى ولو كان أحدهما فارغاً
حتى ولو كان أحدهما أعزبَ في الستين


وعندما تصل الشمس إلى حافة الإفريز
ويتبدل الهواء الأمومة
وتنكشف تلك الطبقة الحزينة من الغبار
عندها ينتقل إلى شرفة أخرى مفتوحة.

إلى طفلتي دالية للشاعر الفلسطيني معين بسيسو

وكمصلوب يحلم.
الأرض النائية كنجم.
لو يسمع وقع خطاه...
أنا أحلم أن نمشي.
في كفي شعلة أزهار.
وورائي أعلام الدمية.
تتلوى فوق الأسوار.
مصلوبك يا وطني يحلم
الأرض النائية كنجم
لو يسمع وقع خطاه...
وورائي أعلام الدمية.
أمراس جليد.
تتلوى فوق الأسوار.
ألف شتاء قد مر وما زال
مصلوبك يا وطني يحلم
لو تلمس قدماه،
الأرض النائية كنجم
لو يمشي
لو يسمع وقع خطاه...

الحمى للشاعر فؤاد قاعود

أربع حيطان فى أودة حر ضيقة

وسلك لمبة زى حبل المشنقة

وأنا على السرير هزيل

نايم قتيل

لاكنى حاسس بالحيطان بيقربوا

وناس كتير بيبصوا وبيستغربوا

...يا هبل إجروا.. إهربوا

! لاربع حيطان بيقربوا

................

صوتى إتخنق

السقف فيه راجل نحيل بيتشنق

والتلج من فوق راسى بينزل عرق

..............

صوتى اتخنق والموج كتير

ماتلحقونى من الغرق

الموج جرفنى بالسرير

البحر مية بتغلى نار

البحر تحته ملايين البوابير

وناس كتير بتتسلق

.............

البحر فيه مارد كبير

صوابعه زى المسامير

وسريرى زى الفلوكة خايقة م الغرق

............

والشط فين

مفيش خلاف مركب خشب متفتتة

الشط فين

أدفت بإيدين ميته

...

الشط بان

ووصلت عند الفجر

ويا الأدان

شيش و باب للشاعر عمر نجم

لما زاد القهر بينهم
و الوطن ما بقاش يساع
من قريش خرج الغلابة
و الوطن جوه ف قلوبهم
و شم منقوش ع الدراع
مسلمين
خلف قائدهم نبينا
ابن عبد الله الأمين
المدينة اتقبلتهم بالرايات
ع الدفوف الطير صدح
للعلالي قام رمح
ف الجريد غنى البلح
و الغنى أصبح مشاع
((طلع البدر علينا
من ثنيات الوداع ))
......................
و الخليفة معاوية قاعد
بين أيادي صحبته
الجواري ع الموائد
و لكل صاحب جاريته
في شماله سبحته
و ف يمينه كاس
ماورد
إن فضي
اليزيد ابنه يصب
يتملي
من دماء سيدنا علي
و أبو موسى الأشعري
و اللئيم الداهية عمرو
(( إن بعد الخمر أمر))
في نفس واحد قالوها
الجواري
و الغلابة ف الحواري
هربوها لاسرائيل
الجليل أصبح و هوه مش جليل
و الخليل
ف النيران بيتشوي
شيش كباب
شيش و باب
للأعادي مفتوحين
مقفولين ع الصحاب
........................

عمر نجم 1988

اللى عنده قصايد كمان ليه يبعتلى ارحب باضافات الجميع لعمر نجم و غيره

حزن على الريحة للشاعر رجب الصاوى

نفسي أسألك..
بيقولوا فيه أنواع كتير للبكا
كلمني عن صوت البكا المصري
وازاي أعيش عصري
وماكنشي واحد من قديم الأزل
باكره حياتي وطعمها الماسخ
ريحة شباب شايخ
وباقول كلام موزون
ألقى الصدى يرجع كلام دايخ
يرجع كلام ممسوخ قوي وبايخ
وماليش كتير في الحزن
وماليش في كل الحزن
وماليش في حزن المشايخ
لكني باكبر زي كل الناس
والليل بيهرب.. والنهار شارخ

الصدمة لفؤاد قاعود

لو نزلت المحروسة ملفوفة القوام
أم العيون بنفسجى
من قصرها العالى و شاورت لى
لوحدى من دون الأنام
حأغض بصرى
و مش حرد السلام
علشان أنا من سنة
نفضت إيدى من الغرام

لو دندن البلبل بصوته الرخيم
و ضم عودته تحت جناحاته
و كنت أنا وحدى النديم
حأقفل ودانى فى وش أنغامه
و أهيل عليه التراب
علشان أنا من سنة
شفت الغنا كداب

لو أصطفانى المضحك المشهور
بلبعه و أتشقلب قصادى
حيطل من عينى الغضب
و مستحيل أبتسم
مهما المهرج هاص و زاط
علشان أنا من سنة
عرفت إن الضحك إبن العياط

لو خصنى الفيلسوف
بحكمته المحفورة فى ذهن الزمن
و بدأ يوجه لى الحديث
حأخد طريق غير طريقه
و أمشى بعيد عن ندوته و الزحام
علشان أنا من سنة
مؤمن بلا جدوى الكلام

لو أتحشى فرشى بريش نعام
و لو ستارة غرفتى
مطرزينها بأجمل الأحلام
محال أغمض عيونى
مهما يزيد لومى
علشان أنا من سنة
ضيعنى نومى

لو النجوم تنزل و تمشى فى الشوارع
و لو العمارات تطير
و لو الضفادع فى الشتا عرقت
و الجو فى أغسطس أصبح مطير
و لو الحمير أتكلمت بفصاحة
و النملة صبحت فى ضخامة الفيل
مش حأندهش
بعد اللى فات
علشان أنا من سنة
إحساسى بالدهشة مات