لما زاد القهر بينهم
و الوطن ما بقاش يساع
من قريش خرج الغلابة
و الوطن جوه ف قلوبهم
و شم منقوش ع الدراع
مسلمين
خلف قائدهم نبينا
ابن عبد الله الأمين
المدينة اتقبلتهم بالرايات
ع الدفوف الطير صدح
للعلالي قام رمح
ف الجريد غنى البلح
و الغنى أصبح مشاع
((طلع البدر علينا
من ثنيات الوداع ))
......................
و الخليفة معاوية قاعد
بين أيادي صحبته
الجواري ع الموائد
و لكل صاحب جاريته
في شماله سبحته
و ف يمينه كاس
ماورد
إن فضي
اليزيد ابنه يصب
يتملي
من دماء سيدنا علي
و أبو موسى الأشعري
و اللئيم الداهية عمرو
(( إن بعد الخمر أمر))
في نفس واحد قالوها
الجواري
و الغلابة ف الحواري
هربوها لاسرائيل
الجليل أصبح و هوه مش جليل
و الخليل
ف النيران بيتشوي
شيش كباب
شيش و باب
للأعادي مفتوحين
مقفولين ع الصحاب
........................
عمر نجم 1988
Sunday, November 8, 2009
شيش و باب للشاعر عمر نجم
Friday, October 2, 2009
قلبي اللى كان بفته لعمر نجم رحمه الله
القصيدة للشاعر المغمور فى محاولة لاشهار قصائده التى تستحق
وكأن مش باقى
غير انى ارثى
من زمان مسكون ببكرة
انما مسجون بأمسى
انا اللى مولود فى وقفتك
يا بورسعيد
ونا اللى كان سبوعى
زغروطة فى زفة شهيد
ونا اللى ف خمسة يونيه
طلقت مريلتى ، وصاحبت نضارتى
وقطعت طيارتى الورق
ولبستلك كاكى
باموت
لو الشجر ف احضانك
ينام باكى
غنيت مع القمرى وفتحت شباكى
لما اللمض عيطت والنور بقى مزرق
انا قلبى كان بفته
انا قلبى اصبح ارق
من نسمة حواريكى
طبطبت على كتفك وقولتلك بوحى
وهبتلك روحى
وقعدت استنى مع الباقيين هلال العيد
من امتى باستنى ومفيش جديد
الا انكسارى
والشيبة من بدرى
وهزيمتى م التجاعيد؟
مشنوق على سلك الكهربا دلتا وصعيد
مشنوق وفوق المصطبة سهران وحيد
مشتاق اناجى القمر اتاريه مخاصمنى
انا اللى راضع مواويله وبضيه فاطمنى
ونا اللى كان القمر يندهلى ف المواعيد
لا صرختى واصلة
او صوتى ... او همستى
وكأن مش باقى
غير
انى
ارثى
سبتمبر 1991
Wednesday, September 9, 2009
سعيد يعني للشاعر الراحل عمر نجم happy
لكني بسعى عشان أكون
يا دوب بشر
من يوم ما ع الدنيا وعيت
وأنا مش سعيد
وكان مدرس الانجليزي ف الصعيد
راجل كشر
وكان يقول
HAPPY
الكلمة تخرج من حلوقنا ع الشفاه
ولا عمرها دخلت قلوب
…………………………
أنا مش نبي
لكن في ليلة
من بنات ليلي الطويل الغيهبي
شفت الرسول
الأمي طه ابن مكة اليعربي
البدر يومها في السما
كان مكتمل
فارد جناحه ع النجوم
حبين
مفيش بينهم كلام غير القبل
أما الرسول
فكأنه في يوم هجرته
لمدينته زاحف بالجمل
اللي حمل
على السنام أغلى البشر
وكان تهامى وكان قمر
أجمل ما شفته ف المنام
وجهه المليح
من جبهته
كان الندى طارح سنا
حلفته بالحبشي بلال
وندهته ساعة الأدان
قلة حنان
يرتوي منها العطش فوق الجبال
وأحلى غنا
حلفته بعيسى المسيح
أن يستريح إلى جواري لحظة
كي يستريح
قلبي المتيم والدبيح
من عبيره ميت سنة
………………………
صحيت عيوني وارتجفت بارتعاش
- ولونى لسه في المنام-
ورجعت من تاني جنين
وكأنه في لحظة ما عاش
إلا برئ
ملهوش طريق غير الحنين
لملمت روحى بالانكماش
ورا الحيطان الضيقين
اللى بتسندها النواية
ومعرشينها بالصفيح
وجهه المليح
…………………….
وبعزم ما في ناديت
ياسيدي
أنا هويت هذا الوطن
ملقتشي فيه ثمن الكفن
لما انتهيت
يا سيدي يا مصطفى
العدل م الدنيا اختفى
ونا مش سعيد
أنا مش Happy
والكلمة دي انجليزي
باختصار يعني روم
يا سيدي يا مصطفى
بعد ما غاصوا في العلن
وفي الخفا
وصلوا لحرام النوم
واستخبوا
في المراتب وف نسيج الألحفة
واحنا عبيد
لا عاد عمر
ولا عاد لنا ابن الوليد
احنا عبيد
وسِيدنا مش هو الإله
سيدنا قابض ع الوريد
قتل النشيد
ورفعنا صِوَره من جديد
تتباهى بيها الأغلفة
وما عدشي لينا غير سنان
لو تنفتح.. منها تبان
معدة وخاوية من زمان
مشتاقة طحن الأرغفة
………………………….
أنا مش نبي
لكني باسعى عشان أكون
وازاي
حاكون
والدم
مالي
الأرصفه؟!
Saturday, August 22, 2009
نقوش على قبر شاعر لعمر نجم
بدأت بالقصيدة دى مش لسبب معين هى جت معايا كده و دى قصيدة للشاعر الراحل عمر نجم و ده من اللى ماتوا و مخدش حقه فى المعرفة و هو شاعر جميل
يسافر قلبك العاشق
يجوب الدنيا ف العتمه
تنام الناس كما العاده
وتايهه الخطوه ف الزحمه
نهايتك امتى يا رحله ؟
وتتاوب
تعاود للملل تانى
لنفس اليأس والاهه
ويفضل قلبك العاشق
تضمه هموم بلا نهايه
بيحلم تيجى ضلايه
تضلل فوقنا م القهره
من خوفنا من الحسره
من الغربه اللى ساكنه
جوه جوانا
وقلبك عمره يا شاعر
مسافر فى بلاد الدنيا متغرب
بلا احباب
بلا اصحاب
يقول الاه
وتبقى الكلمه ف عروقه
يتعذب.......... وتتعذب
وايه يا موت
يا شارب دمنا ميه
يا عاجن عضمنا حنه
يا بادر عمرنا غله
كما الذرات
