سعيد يعني للشاعر الراحل عمر نجم happy

قصيدة من اجمل قصايد عمر نجم

أنا مش نبي
لكني بسعى عشان أكون
يا دوب بشر
من يوم ما ع الدنيا وعيت
وأنا مش سعيد
وكان مدرس الانجليزي ف الصعيد
راجل كشر
وكان يقول

يا عيال.. سعيد يعني
HAPPY

فنقول وراه
الكلمة تخرج من حلوقنا ع الشفاه
ولا عمرها دخلت قلوب
…………………………
أنا مش نبي
لكن في ليلة
من بنات ليلي الطويل الغيهبي
شفت الرسول
الأمي طه ابن مكة اليعربي
البدر يومها في السما
كان مكتمل
فارد جناحه ع النجوم
حبين
مفيش بينهم كلام غير القبل
أما الرسول
فكأنه في يوم هجرته
لمدينته زاحف بالجمل
اللي حمل
على السنام أغلى البشر
وكان تهامى وكان قمر
أجمل ما شفته ف المنام
وجهه المليح
من جبهته
كان الندى طارح سنا
حلفته بالحبشي بلال
وندهته ساعة الأدان
قلة حنان
يرتوي منها العطش فوق الجبال
وأحلى غنا
حلفته بعيسى المسيح
أن يستريح إلى جواري لحظة
كي يستريح
قلبي المتيم والدبيح
من عبيره ميت سنة
………………………
صحيت عيوني وارتجفت بارتعاش
- ولونى لسه في المنام-
ورجعت من تاني جنين
وكأنه في لحظة ما عاش
إلا برئ
ملهوش طريق غير الحنين
لملمت روحى بالانكماش
ورا الحيطان الضيقين
اللى بتسندها النواية
ومعرشينها بالصفيح
وجهه المليح
…………………….
وبعزم ما في ناديت
ياسيدي
أنا هويت هذا الوطن
ملقتشي فيه ثمن الكفن
لما انتهيت
يا سيدي يا مصطفى
العدل م الدنيا اختفى
ونا مش سعيد
أنا مش Happy
والكلمة دي انجليزي
باختصار يعني روم
يا سيدي يا مصطفى
بعد ما غاصوا في العلن
وفي الخفا
وصلوا لحرام النوم
واستخبوا
في المراتب وف نسيج الألحفة
واحنا عبيد
لا عاد عمر
ولا عاد لنا ابن الوليد
احنا عبيد
وسِيدنا مش هو الإله
سيدنا قابض ع الوريد
قتل النشيد
ورفعنا صِوَره من جديد
تتباهى بيها الأغلفة
وما عدشي لينا غير سنان
لو تنفتح.. منها تبان
معدة وخاوية من زمان
مشتاقة طحن الأرغفة
………………………….
أنا مش نبي
لكني باسعى عشان أكون
وازاي
حاكون
والدم
مالي
الأرصفه؟!